عطفوا المفارش.. يا عيال الأحمر!!

عطفوا المفارش.. يا عيال الأحمر!!
الاثنين, 21-نوفمبر-2011 - 17:24:32
نبأ نيوز - خديجة الحاشدي
قلنا جاكم أحمر العين. قالوا جاكم أحمر بكله: علي محسن الأحمر، وحميد الأحمر، وصادق الأحمر، وحسين الأحمر، والباقي من أولاد عبد الله الأحمر من الطرف للطرف.. ويا غيل قد جاك سيل يشلك.. قد عيال الشيخ زهقوا من الليالي الحمراء ويشتو يقلبوها ثورة حمراء، وياسين على من دخل يلعب ويهز القاع بهتافاته.. ثورة.. ثورة.. ثورة.. فيش عليك يا من عوزت الصوف لو جزّيت الاسد..!!

شي بعلمكم قاتل أو سارق أو قاطع طريق يفجر ثورة..!؟ قلنا لكم يا ناشد اللبن إبسر لصورة البقرة، ويا ذي تبي من المشرق غدا، الماوى من المشرق صبوح.. رحم الله جدتي يوم انقلب الارياني على الرئيس السلال جلست تشعر: "يا جيش في العرضي قد إنت راضي، حين يبدلوا بعد المشير قاضي".. ما كانت راضية على القاضي، ريت وربي يبعثها اليوم وتشوف كيف اجتمع المتعوس على خايب الرجاء، وكيف صارت جهالها تضحك على عقالها..!

يا خبرة أين انتم راقدين، قد مصلي الخمس وصايم الست، يخرج من المسجد يهاوز البنت، وقد محمد قحطان وخبرته ما عاد يشتو جهاد من حق الأولين، أعلنوها جهاد على "غرف النوم"، ومن ذاك اليوم والمطاوعة مطوبرين على محلات العسل يدوروا "خلطة الحريو".. ما في صفاط عند مطاوعة الربيع العربي.. تحمّد الله يا بو يمن إنهم رجعوا لكم زمن الخوازيق، وذي مش عارف ويش هي الخوازيق يتفرج فلم المطاوعة يوم مسكوا القذافي، ولاّ صور المرافقة تبعه، وغيرها، وغيرها.. وحياكم الرب يا أخوان الخوازيق، وفاتحي غرف النوم.. بيض الله وجيهكم!

الله يسامح عمتي "زبون" مش راضية تصدق فيه عندنا ثورة، يقودها ضمد أثوار "علي محسن وحميد"، وإن الشوارع زي زرايب الغنم، والجامعات رجعوها حضاير بقر.. وقد البلد في داوية وحنـّة وطنّـة، وبنت كرمان تبترع في الشوارع على طاسة عيال الشيخ، وعاد الردح في الساحات للصبح، لاما تتفالت الركب.. ولاما ينسى عبد الوهاب الآنسي هو إصلاحي أو ماركسي..!

كيف أفهم عمتي- أنا فدا روحها- أننا عندنا ثورة ، وما عاد ينفع كل شوية تنبع لنا "عزّ القبيلي بلاده ولو تجرع وباها" وقد المشايخ أخلوا يبيعون أنفسهم قبل البلاد.. وكيف أقنعها تبطل حُـكى ولعن للقتلة وتودّف بنا مع تجار السلاح والإرهابيين وقد أصبحوا قادة ثورة، وعلى عينك يا حاسد.. قد علي محسن ما عنده صفاط، عنده ذبح البشر والنعجة واحد.. شكلها ودّافة يهودي لحضرة، أو زي محترم دخل محشرة!

قلت لعمتي "زبون" أن أولاد الأحمر يفرقوا من ألف ريال للواحد يومياً، ونفر رز ودبيخ وثلاث مرات بالأسبوع من ربع دجاجة..وإذا هي مش راضية تقر في البيت وتشتي تسير عندهم.. وكل شوية تقول: "يرحل الريس.. ودعناه حافظ وراعي"..لكن يوم قلت لها بايوقع علي محسن أو حميد بدله رئيس، قالت: "يا بنتي محد يبلي البتلة برعيان الغنم"، قد الذي في المبرك أبرك.. خليني جاوعة ولا ضايعة!!

غبني على عمتي لاما أموت، كانت عتهرب من الواطلة للدردوش، وكم يا ناس زيها يفرحوا بالألف ونفر الرز وربع الدجاجة والهدار والبقبقة حق قناة سهيل، والخرط حق مواقع المطاوعة، ويوم يعرفون الحقيقة يغشى عليهم من الفجيعة.. كم مرات ومرات قلناها: يا ناشد اللبن إبسر لصورة البقرة، وذي يغركم هداره تدلكم أفعاله.. قيسوا يا خبرة قبل القطع ما عاد ينفع بعد القطع قياس.. هذا وطننا ووطن آبائنا وأجدادنا ، وليس من حق أبو واحد يندعي أنه حق أمه أو جدته!!

المعارضة عاملين زي البنت الخيبة اللي قالوا لها "علّي صوتش يعلى شرطش".. ودفت ولا نفعها هدار ولا خرط "سهيل"، انتهت زي ما انتهت ذي ما تعرف تتبخـــر!!

يعني لا عاد فيه ثورة، ولا جني، ولا عفري.. ما فيه غير المبادرة الخليجية.. وذي يشتي يطلع رئيس ما معه إلاّ الصندوق أو يروّح لعند أمه يمهّر في الديمة ويغسل صحون.. أما حمران العيون أولاد الأحمر وعلي محسن ما معهم غير يعطفوا مفارشهم ويريعوا للمحاكمة على فعلتهم السودة بمسجد النهدين..!

قلناها من زمان محد يقول بُـم إلاّ بمشافر، وما في ذرة تشانع جمل- يا خلق الله- ولا ينفعكم الطعن لا ظهر ابن علوان.. وكم قلنا بطلوا إرهاب وتخريب وقتل ونهب وما في فايدة، زي مغني جنب اصنج.. لاما صدر قرار مجلس الأمن الدولي رجعت بنت كرمان تحبب ركب من دولة لدولة، زي ذي يحسك محترمه سفال العقبة!.

الحين المشكلة مش هنا.. لكن في أخوان الخوازيق وفتوحات غرف النوم، أين عيسيروا يجاهدوا بالخوازيق بعد هذا الخازوق الثوري ذي رجعهم للانتخابات..؟؟؟ وهل سيعوضهم محمد قحطان ثمن "خلطة الحريو" بعد ما فشل في غزو غرف النــوم..!؟؟؟

معليش يا عمة "زبون" خلينا نجوع، ونسمر بالظلمة، ونلبس ثيابنا القديمة، ونصبر.. بس أبداً ما نبيع بلدنا وأمنا اليمن بألف ريال، ونفر رز وشوية دبيخ وربع دجاجة.. ولمن؟؟ لأقبح خلق الله أولاد الأحمر والمطاوعة بياعين الدين للأمريكان في أفغانستان!!